Rotterdam Konvensiyasının ratifikasiyası üzrə regional seminar baş tutub

Şərqi Avropa və Mərkəzi Asiyadan olan üzv olmayan ölkələr üçün Rotterdam Konvensiyasının ratifikasiyası üzrə regional seminar baş tutub. 4-6 iyul 2023-cü il tarixlərində keçiriləcək seminar Azərbaycan, Belarus, Tacikistan, Türkmənistan və Özbəkistanın Konvensiyaya üzv olmaq səylərinin dəstəklənməsi istiqamətində xüsusi əhəmiyyətə malikdir.

Rotterdam Konvensiyasına üzv dövlətlər beynəlxalq ticarətdə pestisidlərin və müxtəlif təhlükəli kimyəvi maddələrin insan sağlamlığına və ətraf mühitə zərərli təsirinin aradan qaldırılması məqsədilə ümumi səylərini birləşdirir. Seminarın keçirilməsində məqsəd maraqlı tərəflərin iştirakı ilə sözügedən konvensiyanın ratifikasiyasına kömək göstərməkdən, o cümlədən Azərbaycanda kimyəvi təhlükəsizlik üzrə səylərin birləşdirilməsindən ibarətdir. Seminar zamanı bu məqsədə yönəlmiş məsələlər müzakirə edilərək tədbirlər planı müəyyən edilib.

“Azərbaycan Respublikası Hökuməti və FAO rəsmi olaraq, milli fəaliyyət planlarının və strategiyaların hazırlanması, o cümlədən kənd təsərrüfatının və kənd yerlərinin dayanıqlı inkişafının təşviq olunması üzrə fəaliyyətlər həyata keçirir. Bugünkü iclas da bu əməkdaşlığın təşviq olunması üçün vacib platforma rolunu oynayır.” FAO-nun Azərbaycandakı Tərəfdaşlıq və Əlaqələndirmə Ofisinin rəhbəri vəzifəsini icra edən Bariz Mehdiyev açılış nitqində bildirib.

Bariz Mehdiyev FAO Qlobal Ətraf Mühit Fondu (GEF) ilə birgə Azərbaycanın da iştirak etdiyi “Mərkəzi Asiya ölkələri və Türkiyədə davamlı üzvi çirkləndiricilərin və pestisidlərin həyat dövrünün idarə edilməsi və zərərsizləşdirilməsi” layihəsinin uğurlu fəaliyyətini vurğulayıb. Layihə əhalinin sağlamlığına və ətraf mühitə yüksək risk yaradan davamlı üzvi çirkləndiricilərin və digər köhnəlmiş pestisidlərin tullantılarının azaldılmasına, eləcə də bu sahədə hüquqi və institusional bazanın möhkəmləndirilməsinə töhfə verib.

FAO-nun 2022-31-ci illər üzrə Strateji Çərçivəsinə uyğun olaraq, Rotterdam Konvensiyasının işi 2030-cu ilə qədər daha səmərəli, inklüziv və dayanıqlı aqro-ərzaq sistemlərinə keçidin ayrılmaz hissəsi hesab olunur.

FAO və BMT-nin Ətraf Mühit Proqramın tərəfindən birgə idarə olunan Rotterdam Konvensiyasının əsas məqsədi insan sağlamlığını və ətraf mühiti beynəlxalq kimyəvi maddələrin və pestisidlərin potensial təhlükələrindən qorumaqdır.

Tədbir FAO-nun Azərbaycandakı Tərəfdaşlıq və Əlaqələndirmə Ofisinin və Azərbaycan Respublikası Ekologiya və Təbii Sərvətlər Nazirliyinin Təşkilatıçılığı ilə həyata keçirilib.