FAO və Aqrarco MMC fındıqçı fermerlərə dəstək tədbirləri həyata keçirir

BMT-nin Ərzaq və Kənd Təsərrüfatı Təşkilatı (FAO) və Aqrarco MMC-nin birgə əməkdaşlığı çərçivəsində Zaqatala, Balakən, Qax, Oğuz, Qəbələ və Xaçmaz rayonlarından olan fındıqçı fermerlərin bilik və bacarıqlarının artırılması məqsədilə fındıq bağının idarə olunması, yeni mövsümə hazırlıq işləri, kükürdün tətbiqi və suvarma sistemi ilə gübrələrin verilməsinə dair nümayiş məqsədli praktiki fəaliyyətlər həyata keçirilib.

Fəaliyyətlər hökumət tərəfindən maliyyələşdirilən "Azərbaycanda fındıqçılıq sahəsində səmərəliliyin və dayanıqlılığın sürətləndirilməsi” layihəsi çərçivəsində icra olunur.

Təlimlər çərçivəsində kiçik təsərrüfat sahibləri, kənd təsərrüfatı istehsalında aparıcı aqrobiznes şirkətlərindən biri olan Aqrarco MMC-nin tətbiq etdiyi texnoloji yeniliklər və proseslərin nümayişində iştirak ediblər. Qarşılıqlı təcrübə mübadiləsi iştirakçıların bacarıqlarının və bu sahədə məlumatlılığının artırılmasına imkan yaradıb. Fəaliyyətlər FAO və Agrarco MMC şirkətinin birgə anlaşma memorandumuna uyğun olaraq həyata keçirilir.

Qeyd olunan əməkdaşlıq özəl sektor ilə tərəfdaşlıq fəaliyyətlərini genişləndirməklə Dayanıqlı İnkişaf Məqsədlərinə (DİM) nail olmaq üçün bir sıra səyləri birləşdirməyə yönəlib. Daha çox sayda fermerin (xüsusilə kiçik  təsərrüfat sahibləri) bilik və bacarıqlarının artırılması, ölkədə kənd təsərrüfatı və ərzaq istehsalı sistemlərinin daha da inkişaf etməsinə töhfə verilməsi, genişmiqyaslı inkişaf fondlarından, xüsusilə də Yaşıl İqlim Fondundan (YİF) birgə maliyyələşdirmə imkanlarının artırılması əsas fəaliyyət istiqamətlərini təşkil edir.

Zaqatala və Xaçmaz rayonlarında baş tutan praktiki təlimlərdə iştirakçılara fındıqçılıq sahəsində hazırda həyata keçirilən fəaliyyətlərə dair ətraflı məlumat verilib və bu kimi tədbirlərin keçirilməsinin yerli bölgə və fındıqçılıq sahəsi üçün vacibliyi diqqətə çatdırılıb. Təlim zamanı layihənin hədəf rayonlardan olan 40 fındıqçı fermerlərə (9 qadın, 31 kişi) mövsümi xəstəliklər və onlara qarşı mübarizə tədbirləri haqda məlumatlar verilərək, əyani şəkildə müxtəlif məhlulların hazırlanması və çiləyicilərin nizamlanaraq bağların düzgün çilənməsi nümayiş etdirilib. Bununla yanaşı, iştirakçılar fındıq ağaclarının gələcək məhsuldarlığına və ağacların vegetasiya müddətində inkişafına müsbət təsir edəcək gübrələmə, gübrə növləri və tətbiq normaları haqda məlumatlandırılıb. Fındıqçı fermerlərə fertiqasiya yolu ilə (fertiqasiya gübrələrin suvarma suyu ilə birlikdə bitkilərə çatdırılmasıdır) doğru gübrələmənin təşkili əyani şəkildə nümayiş etdirilib.

Əməkdaşlıq sazişinə əsasən, bu kimi təlim və görüşlərin keçirilməsinin davamlı olması hədəflənir. Növbəti təcrübə mübadiləsi tədbirinin payız aylarında məhsul yığımı, qurudulması və saxlanması mövzularında keçirilməsi nəzərdə tutulur. Əlavə olaraq, istehsal edilmiş fındığın keyfiyyətinin artırılması və ona əlavə dəyər qatılması istiqamətində əməkdaşlıq, tərəflərin növbəti mərhələdə birgə fəaliyyəti olaraq müzakirə ediləcəkdir.

Layihə FAO-Azərbaycan Tərəfdaşlıq Proqramı çərçivəsində Azərbaycan Respublikasının Kənd Təsərrüfatı Nazirliyi ilə birgə həyata keçirilir.