Miqrasiya məlumatlarının idarə edilməsi və statistik məlumat mənbəyi kimi elektron Readmissiya İşlərinin İdarə Edilməsi Sistemi üzrə Miqrasiya üzrə Regional Təlim Mərkəzində təlim seminarı keçirildi

Proqram fəaliyyətləri çərçivəsində Beynəlxalq Miqrasiya Təşkilatı (BMqT) tərəfindən Elektron Readmissiya İşlərinin İdarə Edilməsi Sistemi (eRCMS, Sistem) qurulur və Azərbaycanda Dövlət Miqrasiya Xidməti ilə birgə yerləşdirilir. ERCMS geniş statistik funksiyalara malik olması Azərbaycan ilə Avropa İttifaqına (Aİ) üzv dövlətlər arasında readmissiya işlərinin daha sürətli və daha səmərəli işlənməsinə, həmçinin dərin statistik hesabatların yaradılmasına imkan verəcək. Sistem  istifadəçiləri anonimləşdirilmiş məlumatlar əsasında müxtəlif statistik məlumat kateqoriyalarını dərhal tərtib edə biləcəklər. Statistik məlumatların təsnifləndirilməsi və vizuallaşdırılması müvafiq dövlət orqanlarına və qərar qəbul edənlərə onların təhlili və interpretasiyasını təkmilləşdirmək üçün dəstək olacaq.

Readmissiya ilə bağlı dəqiq və çox yönlü məlumatlara çıxış büdcə və əməliyyat planlamasını, kadr təminatını, siyasətin işlənib hazırlanmasını, qanunvericilik tənzimləməsini, milli səviyyədə reinteqrasiya səylərini, həmçinin beynəlxalq tərəfdaşlarla, məsələn, Azərbaycan-Aİ Birgə Readmissiya Komitəsi çərçivəsində daha konstruktiv dialoqa təkan verəcək.

Praktikada readmissiya ilə bağlı statistika çox vaxt çoxsaylı miqrasiya prosesləri, tendensiyalar və dövlət orqanları tərəfindən miqrasiyanın idarə edilməsi funksiyalarının daha geniş spektrinin yerinə yetirilməsi kontekstində təhlil ediləcəkdir. Bunu nəzərə alaraq BMqT-nin Azərbaycan nümayəndəliyi, ölkənin bir sıra dövlət qurumlarının, o cümlədən Dövlət Miqrasiya Xidməti, Xarici İşlər Nazirliyi, Daxili İşlər Nazirliyi, Dövlət Statistika Komitəsi, Diasporla İş üzrə Dövlət Komitəsi, Qaçqınların və Məcburi Köçkünlərin İşləri üzrə Dövlət Komitəsi, İnsan Hüquqları üzrə Müvəkkilliyi, Əmək və Əhalinin Sosial Müdafiəsi Nazirliyi əməkdaşları üçün miqrasiya məlumatlarının idarə edilməsi üzrə təlim seminarının keçirilməsinə dəstək verib. Miqrasiya məlumatları mövzusu daha geniş auditoriyanın marağına səbəb olduğundan, seminara Miqrasiya Məktəbi və Miqrasiya Könüllüləri İctimai Birliyinin iştirakçıları da qatılıb.

Tədbir Dövlət Miqrasiya Xidməti və BMqT-nin Azərbaycan nümayəndəliyinin digər birgə təşəbbüsü əsasında yaradılan Miqrasiya üzrə Regional Təlim Mərkəzi (RTCM) tərəfindən keçirilib. RTCM-in kurikulumunda miqrasiya məlumatlarının idarə edilməsi və onların sübuta əsaslanan siyasətin inkişafı üçün əhəmiyyətinə dair mövzular var. RTCM-dən olan təlimçilər beynəlxalq miqrasiya statistikasının məlumat mənbələri, miqrasiyanın idarə edilməsində məlumatların rolu, miqrasiya məlumatlarına tələbat, Azərbaycanda miqrasiya məlumatlarının idarə edilməsi və eRCMS-in statistik funksiyaları haqqında təqdimatlar hazırlayıblar.

Elektron Readmissiya İşlərinin İdarə Edilməsi Sistemi Avropa İttifaqı tərəfindən maliyyələşdirilən Aİ Readmissiya Bacarıqlarının Gücləndirilməsi Proqramı (EURCAP) çərçivəsində BMqT tərəfindən hazırlanmışdır. Həmçinin, EURCAP Mexanizmi çərçivəsində eRCMS-in son istifadəçiləri və inzibatçıları üçün miqrasiya məlumatlarının idarə edilməsi, eRCMS-nin institusionallaşdırılması və s. təlim modulları paketi hazırlanmışdır.

Miqrasiya üzrə Regional Təlim Mərkəzi Azərbaycan, ona qonşu ölkələr, eləcə də Mərkəzi Asiya, Yaxın Şərq, Şərq Tərəfdaşlığı və digər ölkələrdən olan  müxtəlif maraqlı tərəflərin nümayəndələri üçün təlim müəssisəsi və bilik mərkəzidir. RTCM Dövlət Miqrasiya Xidməti və BMqT-nin Azərbaycan nümayəndəliyi  tərəfindən BMqT-nin İnkişaf Fondunun maliyyə yardımı ilə yaradılmışdır.