Fermer Sahə Məktəblərinin yaradılması üçün təlimlər həyata keçirilir

BMT-nin Ərzaq və Kənd Təsərrüfatı Təşkilatı (FAO)-Azərbaycan Tərəfdaşlıq Proqramının “Qoyunçuluğun davamlı inkişafı və ərzaq məhsullarının istehsalı üzrə dəyər zəncirinin yaradılması və həyata keçirilməsi” layihəsi çərçivəsində qoyunçuluq sahəsində Fermer Sahə Məktəblərinin yaradılması üçün təlimlər həyata keçirilir.

"Fermer Sahə Məktəbləri" yanaşması fermerlərə öz inkişafları üçün müxtəlif praktiki biliklərə çıxış imkanı yaradan xüsusi bir beynəlxalq hesab olunur. Sahə məktəbləri çərçivəsində heyvandarlıq sahəsində mövcud olan xəstəliklərin müalicəsi, qoyunçuluq təsərrüfatlarının düzgün idarə olunması və dayanıqlı inkişafı üzrə təlimlərin keçirilməsi planlaşdırılır. Bu yanaşma yerli fermerlərə öz istehsal sistemlərini təhlil etmək, əsas məhdudiyyətləri müəyyən etmək məqsədi daşıyır. Təlimlərdə iştirak edən fermerlər yeni texnologiyaların sınaqdan keçirilməsi üçün təsərrüfatda təcrübələr aparmaqla, digər ekspertlərin məsləhətinin köməyi ilə bu məhdudiyyətlərin həlli yolunda fəaliyyətlərdə iştirak edəcəklər.

Təlim sessiyaları Azərbaycanın Ağcabədi, Beyləqan və Zaqatala rayonlarında (layihənin pilot rayonları) keçirilir. Layihə çərçivəsində üç rayonda iki həftədən bir görüşlərin keçirilməsi və bu rayonlarda bir neçə Fermer qruplarının yaradılması planlaşdırılır.

“Fermer Sahə Məktəbləri Azərbaycanda yeni və unikal bir yanaşmadır”, - deyə FAO-nun Fermer Sahə Məktəbləri üzrə mütəxəssisi Elşad Rzayev bildirib. “Xüsusilə, Ağcabədi rayonunda fermerlər arasında bu proqrama böyük marağı müşahidə etdik ki, bu da bizim üçün hər bir kənddə birdən çox fermer qruplarını yaratmaq üçün böyük potensial sayıla bilər”. Təlimlər FAO-nun Fermer Sahə Məktəbləri üzrə beynəlxalq mütəxəssisi Jurjen Draaijer və bu sahədə potensialın gücləndirilməsi üzrə milli mütəxəssis Elşad Rzayevin dəstəyi ilə həyata keçirilir.

Təlimlər zamanı qoyunçuluqla əlaqəli Fermer Sahə Məktəbləri (FFS) üçün fasilitatorların təlimat kitabçasından da istifadə olunub. Kitabça ənənəvi bilikləri beynəlxalq təcrübələrlə birləşdirir və fermerlər üçün ən uyğun üsul və texnologiyaları izah edir.

Azərbaycan hökuməti tərəfindən maliyyələşdirilən layihə FAO-Azərbaycan Tərəfdaşlıq Proqramı çərçivəsində həyata keçirilir.