Beynəlxalq Miqrasiya Təşkilatının Azərbaycan nümayəndəliyi Sosial Xidmətlər Agentliyində “İnsan alverinə qarşı mübarizə” mövzusunda təlim təşkil edib

Sosial Xidmətlər Agentliyində keçirilən təlimin rəsmi açılış mərasimində BMqT-nin Azərbaycan nümayəndəliyinin rəhbəri Vladimir Qyorqiyev, Sosial Xidmətlər Agentliyinin sədri Vüqar Behbudov və ABŞ səfirliyinin missiya rəhbərinin müavini Maykl Dikerson iştirakçıları salamlayaraq təlimlərin vacibliyindən söz açdılar.

Açılış nitqdə Vladimir Qyorqiyev insan alveri qurbanları ilə işləyən dövlət qulluqçularına xidmətlərin keyfiyyətinin yüksəldilməsi məqsədilə ekspertlər tərəfindən keçirilən təlimlərdə iştirak etmək imkanının təmin edilməsinin vacibliyini vurğuladı.

“BMqT insan alveri qurbanlarını dəstəkləmək, eləcə də Bakıda və regionda səhiyyə işçiləri arasında qurbanlarla etik davranışı təşviq etmək üçün ƏƏSMN ilə əməkdaşlıq etməkdən və hazırki təlimlə bu əməkdaşlığı bu gün də davam etdirməkdən məmnundur:  "Nazirliyin bu təşəbbüsü, ilk növbədə də öz əməkdaşları və digər qurumların təmsilçiləri arasında insan alveri üzrə biliklərin artırılması, həmçinin digər nazirliklərlə, o cümlədən insan avlerinə qarşı mübarizədə aparıcı qurum olan Daxili İşlər Nazirliyi ilə əməkdaşlığın genişləndirilməsi istiqamətində atılan addımlar hökümətin bu sahədə üzərinə götürdüyü öhdəliklərini və səylərini nümayiş etdirir”.

Açılış nitqlərindən sonra layihə koordinatoru Ersilia Apreda və BMqT-nin Azərbaycan nümayəndəliyindən Anar İskəndərov təlimin məqsədləri barədə iştirakçılara məlumat verdilər.

Təlim insan alveri fenomeni, insan alverinin növləri və üsulları, insan alverinə dair Azərbaycanda milli qanunvericilik, İnsan Alverinə Qarşı Mübarizə üzrə Azərbaycan Respublikasının Strategiyası, insan alveri qurbanlarına sosial yardım, qurbanların reabilitasiya və reinteqrasiyası, insan alverinə qarşı mübarizədə erkən identifikasiyanın rolu, erkən göstəricilər kimi mövzuları əhatə etmişdir.

Təlim zamanı dövlət orqanlarının müvafiq məsul şəxsləri olan iştirakçılar insan alveri üzrə təcrübə, yanaşma, biliklərini müzakirə etmək və fikir mübadiləsi aparmaq imkanı əldə etdilər.

Təlimin sonunda iştirakçılara sertifikatlar təqdim olundu.

2015-ci ildən etibarən BMqT tərəfindən həyata keçirilən USAID-in İnsan Alverinə Qarşı Mübarizə layihəsi Azərbaycan hökumətinə və QHT-lərə insan alverinin və məcburi əməyin qarşısının alınması və onunla mübarizədə, o cümlədən gender əsaslı zorakılığın aradan qaldırılmasında Azərbaycanın effektivliyini daha da artırmaqda kömək edir. Bura insan alveri və məcburi əməyin potensial və faktiki qurbanlarına kömək edən sığınacaqları idarə edən vətəndaş cəmiyyəti təşkilatlarına texniki və maliyyə dəstəyi də daxildir.