Press reliz

Köməkçi texnologiyalar və reabilitasiya sektorunun Azərbaycanda gücləndirilməsi layihəsi ilə bağlı ÜST-nin Avropa üzrə Regional Ofisinin missiyası yekunlaşıb

25 нојабр 2021

  • “Köməkçi texnologiyalar (KT) və reabilitasiya sektorunun Azərbaycanda gücləndirilməsi” layihəsi çərçivəsində Ümumdünya Səhiyyə Təşkilatının (ÜST) Avropa üzrə Regional Ofisinin missiyası ölkəyə səfər edib.

ÜST-nin Avropa üzrə Regional Ofisinin Əlillik, Reabilitasiya və Palliativ Yardım üzrə regional müşaviri Satiş Mişra və Əlillik, Reabilitasiya və Səhiyyə xidmətləri üzrə mütəxəssisi Dr. Katal Morqanın iştirakı ilə baş tutan missiyanın məqsədi Azərbaycanın KT və reabilitasiya sektorunun fəaliyyətini müşahidə etmək, maraqlı tərəflərlə ÜST-nin təşkilatçılığı ilə dünyanın 67 ölkəsində keçirilmiş və 2021-ci ildə Azərbaycanda həyata keçirilən KT üzrə ehtiyacları öyrənən “r-ATA” (“rapid-Assistive Technology Assessment WHO survey tool”, sürətli Köməkçi Texnologiyaların Qiymətləndirilməsi üzrə ÜST-nin sorğu vasitəsi) sorğusunun nəticələri ilə bağlı fikir mübadiləsi aparmaq, mümkün inkişaf yollarını müzakirə etmək idi. 

 

Missiya çərçivəsində mütəxəssislər ÜST-nin Azərbaycan Nümayəndəliyinin əməkdaşları, Əmək və Əhalinin Sosial Müdafiə nazirliyinin, Səhiyyə nazirliyinin, İcbari Tibbi Sığorta Dövlət Agentliyinin, TƏBİB və digər müvafiq qurumların rəhbərləri ilə görüşlər keçirib Azərbaycanda KT və reabilitasiya sektorunun cari vəziyyəti, sorğu və müşahidə nəticələri, mümkün inkişaf yollarını ətraflı müzakirə ediblər. 

 

Bundan əlavə,  Əmək və Əhalinin Sosial Müdafiəsi Nazirliyinin Protez-Ortopedik İstehsalat və Reabilitasiya Mərkəzi, DOST Agentliyi, Səhiyyə Nazirliyinin Elmi-Tədqiqat Tibbi Bərpa İnstitutuna səfərlər zamanı Azərbaycanda köməkçi vasitələrin istehsalı, əhalinin bu vasitələrlə təminatı, reabilitasiya xidmətlərinin səviyyəsi və maddi-texniki bazaya baxış keçirilib. Missiya əsas maraqlı tərəflərin görüşü ilə yekunlaşıb və tərəfdaşlara keçirilən sorğunun nəticələri təqdim olunub. 

Qeyd edək ki, KT insanlara sağlam, məhsuldar, müstəqil və ləyaqətli həyat sürməyə, təhsildə, əmək bazarında və vətəndaş cəmiyyətində iştirak etməyə imkan yaradır. Bu gün dünyada 1 milyard insanın məhsuldar, inklüziv və ləyaqətli bir həyat yaşaması üçün KT-yə ehtiyacı var, ancaq qlobal olaraq hər 10 nəfərdən yalnız 1 nəfərin ehtiyacı olduğu KT-dən istifadə etmək imkanı var. KT-dən istifadə bir çox insanın öz funksionallığını, sağlamlığını və rifahını qorumaq və yaxşılaşdırmaq, təhsil, iş və sosial fəaliyyətlərdə iştirak etməsi üçün zəruridir. Adətən KT-yə ehtiyacı olan insanların çoxu yaşlı insanlar, əlilliyi olan şəxslər, münaqişələr nəticəsində xəsarət alanlar və xroniki xəstəliklərdən əziyyət çəkənlərdir. Azərbaycanda bu sahədə 6 funksional sahə üzrə (hərəkətlik, görmə, eşitmə, kommunikasiya, dərketmə və özünəqulluq) ehtiyacların öyrənilməsi ilk dəfə Əmək və Sosial Müdafiə Nazirliyinin təşəbbüsü və ÜST-nin dəstəyi ilə 2021-ci ildə ÜST-nin xüsusi sorğu vasitəsi olan “r-ATA” tədqiqatının keçirilməsi ilə aparılıb. 

Köməkçi texnologiyalar və reabilitasiya sektorunun Azərbaycanda gücləndirilməsi layihəsi ilə bağlı ÜST-nin Avropa üzrə Regional Ofisinin missiyası yekunlaşıb

Fanara Bunyadzada

Fənarə Bünyadzadə

ÜST
İctimaiyyətlə əlaqələr üzrə mütəxəssis

Bu təşəbbüsdə iştirak edən BMT qurumları

ÜST
Ümumdünya Səhiyyə Təşkilatı

Bu təşəbbüs vasitəsilə dəstəklədiyimiz məqsədlər