FAO və Azərsun Holdinqin birgə əməkdaşlığı çərçivəsindəfermerlərə heyvandarlıq sahəsində təlimlər keçirilib

BMT-nin Ərzaq və Kənd Təsərrüfatı Təşkilatı (FAO) və “Azərsun Holdinq”  arasında imzalanmış memorandum çərçivəsində kənd təsərrüfatı istehsalı, dəyər zəncirinin inkişafı və heyvandarlıq sahəsində təlimlər baş tutub. 

Ağcabədi və Beyləqan rayonlarında baş tutan təlimlərin məqsədi heyvandarlıq sahəsinin davamlı inkişafı və dəyər zəncirinin yaradılması, heyvandarlıq təsərrüfatlarında peyvəndləmə, südçülük, yemləmə və baytarlıq kimi mövzuları əhatə etməklə fermerlər arasında məlumatlılıq səviyyəsinin artırılması olub. Təlimlərdə heyvandarlıq sahəsində xəstəliklərin idarəedilməsi, fermerlərin təchizat vasitələri, informasiyaya çıxış imkanlarının genişləndirilməsi mövzuları müzakirə olunub. Həmçinin, heyvandarlıq sahəsində yaranan xəstəliklərin aradan qaldırılması və düzgün şəkildə müalicə üsullarının öyrənilməsinin zəruriliyi vurğulanıb.

BMT-nin Ərzaq və Kənd Təsərrüfatı Təşkilatı (FAO) və “Azərsun Holdinq”  arasında imzalanmış memorandum kənd təsərrüfatı istehsalı və dəyər zəncirinin inkişafı, ekoloji kənd təsərrüfatı və ekoloji mühafizə, aqrar məsləhət xidmətləri kimi sahələrdə birgə əməkdaşlıq və ortaq fəaliyyətlərin həyata keçirilməsini hədəfləyir.

Əməkdaşlıq Memorandumu çərçivəsində daha səmərəli, inkluziv və dayanıqlı aqro-ərzaq sistemlərinə keçid məqsədi ilə təbii sərvətlərin səmərəli istifadəsinin təmin olunması və iqlim dəyişikliklərinə uyğunlaşmağa dəstək olacaq yeni yanaşmalar, texnologiya və innovasiyaların öyrənilməsi üzrə fəaliyyətlər planlaşdırılıb. Memorandum özəl sektorun qida təhlükəsizliyi və aqro-ərzaq sistemlərinin inkişaf etdirilməsi işlərinə daha fəal cəlb edilməsi, bu sahədə effektiv əməkdaşlığın möhkəmləndirilməsi və genişləndirilməsi üzrə bir sıra fəaliyyətlərin həyata keçirilməsini nəzərdə tutur.