BMT-nin Azərbaycandakı rezident əlaqələndiricisi Vladanka Andreevanın "Azərbaycan Qlobal DİM İndeksində" tədbirində çıxışı

Hörmətli hökumət tərəfdaşları və BMT həmkarları,

İki il əvvəl BMT və Dövlət Statistika Komitəsi arasında Birgə DİM üzrə İşçi Qrupunun yaradılması ilə təməlini qoyduğumuz işin bu gün də BMT-Azərbaycan Dayanıqlı İnkişaf üzrə Əməkdaşlıq Sazişin həyata keçirilməsinin daha geniş çətiri altında davam etdiyini görməkdən məmnunam.

Bundan əlavə, mən Azərbaycan hökumətinin Dayanıqlı İnkişaf Məqsədlərinə nail olmaq üçün nəinki cəsarətli siyasət və fəaliyyətlərlə addımladığını, həm də 2030 Gündəlik üçün əvəzedilməz təməl daşı olan DATA-ya düşünülmüş şəkildə diqqət yetirdiyini görməkdən məmnunam.

Birləşmiş Millətlər Təşkilatı 2030 Gündəliyinin icrasına nəzarət etmək və ona dair hesabat vermək məqsədilə ölkələri yaxından dəstəkləyir.

BMT-nin İqtisadi və Sosial Məsələlər Departamentinin (BMT İSMD) Statistika Şöbəsinin hər il hazırlanan Dayanıqlı İnkişaf Məqsədləri üzrə Hesabat ən son mövcud məlumatlardan və qiymətləndirmələrdən istifadə edərək DİM üzrə tərəqqi barədə qlobal icmal təqdim edən alətlərdən biridir.

Bu ilki Hesabatda qarşımızda duran problemlərin ciddiliyi və miqyası vurğulanır, yoxsulluğun və aclığın aradan qaldırılması, səhiyyə və təhsilin yaxşılaşdırılması, əsas xidmətlərin göstərilməsi və daha çox məsələlərdə illərlə əldə edilmiş tərəqqinin tənəzzülü əks olunur.

Hesabat həmçinin göstərir ki, “harada olduğumuzu və hara getdiyimizi tam başa düşmək üçün hələ də vaxtında, yüksək keyfiyyətli, müfəssəl məlumatlara malik deyilik. Məlumat və informasiya infrastrukturuna investisiyalar milli hökumətlərin və beynəlxalq ictimaiyyətin prioriteti olmalıdır”.

Bugünkü müzakirələrin diqqət mərkəzində olan müstəqil DİM İndeksi üzrə Hesabatı Dayanıqlı Həllərin Tərtibi Şəbəkəsi hazırlayır və həmin hesabat eyni zamanda Hökumətlər və tərəfdaşlar üçün DİM-lərin həyata keçirilməsində əldə edilmiş tərəqqi hər il qeyd etmək üçün faydalı mənbədir.

Hesabatda DİM-lərə nail olmaq baxımından ölkələri sıralamaq üçün BMT İSMD-nin məlumat bazasından və digər açıq məlumatlardan istifadə edilir.

Azərbaycanda olduğu kimi, qlobal DİM İndeksinə və İdarə Panelinə olan maraq 2030-cu ilə qədər DİM-lərə nail olmaq məqsədilə məlumatların mövcudluğu və icra problemlərini anlamaq, fəaliyyət üçün prioritetləri müəyyən etmək, tərəqqini izləmək, hesabatlılığı təmin etmək və nail olmaq üçün aradan qaldırılmalı olan boşluqları müəyyən etmək üçün bir çox milli təşəbbüslərə təkan verir.

Və bu gün biz məhz bunu edirik!

Hörmətli həmkarlar və tərəfdaşlar:

Azərbaycan Qlobal DİM İndeksində çox böyük irəliləyiş göstərərək, 6 il ərzində 15 pillə yüksələrək və 163 ölkə arasında 50-ci yerdə olsada da, biz hər iki sahədə səmərəli işi davam etdirməliyik: məlumat boşluqlarını aradan qaldırmalı və ölkəni bu sahədən geri çəkən problemləri həll etməliyik.

BMT-nin Azərbaycandakı nümayəndəliyi bu istiqamətdə Dövlət Statistika Komitəsi və digər tərəfdaşlarla mütəmadi şəkildə işləyir və bugünkü görüş də bu öhdəliyə doğru daha bir addımdır.

Azərbaycan ardıcıl Könüllü Milli İcmal hesabatları ilə də regionda liderlik edir və həmin sıradan olan dördüncü hesabat 2023-cü ildə təqdim olunacaq.

BMT-nin Azərbaycandakı Ölkə Qrupu bütün bu prosesdə tərəfdaşlarımızı dəstəkləməyə hazırdır.

Hörmətli tərəfdaşlar,

Mən bu gün səmərəli müzakirələri səbirsizliklə gözləyirəm və ümid edirəm ki, bu məsləhətləşmə Azərbaycan üçün DİM məlumat mənzərəsini daha da inkişaf etdirmək üçün müsbət impuls yaradacaq.

Çox sağ olun!