BMT-nin Rezident Əlaqələndiricisi Qulam İshaqzainin “Azərbaycanda özəl sektorda qadınlar: imkanlar və çətinliklər” adlı Gender Qiymətləndirilməsi hesabatının təqdimat tədbirindəki çıxışı

Hörmətli, Ailə, Qadın və Uşaq Problemləri üzrə Dövlət Komitəsinin sədri Hicran Hüseynova!

İsveçrə Konfederasiyasının Azərbaycan Respublikasındakı səfiri zati-aliləri cənab Filipp Stalder!

BMT həmkarları, diplomatik korpus üzvləri!

Azərbaycanın müxtəlif və yüksək rəqabətədavamlı biznes cəmiyyətinin nümayəndələri!

Zati-aliləri,

Xanımlar və cənablar, xoş gördük!

Bu gün “Azərbaycanda özəl sektorda qadınlar, çətinliklər və imkanlar” adlı Gender Qiymətləndirilməsi Hesabatının açılış tədbirindən Sizi salamlayır və bu mövzuya dəstək və maraq göstərərək iştirak etdiyinizə görə təşəkkür edirəm.

Keçmişdə nəzərimiz həmişə hökumətlə bağlı olduğu halda bu qiymətləndirmə, özəl sektoru hədəflədiyinə görə unikal və yenilikçidir.

Buna görə iş yerlərində gender bərabərliyini inkişaf etdirmək üçün özəl sektorun prosesə cəlb olunmasının vacibliyi danılmazdır.

BMT-nin baş katibi Antonio Guterreş, iqtisadi səlahiyyətlərin gücləndirilməsinin Dayanıqlı İnkişaf Məqsədlərinə (DİM) nail olmaq üçün zəruri şərt olduğunu deyib.

Şirkətlərin necə fəaliyyət göstərmələri, eləcə də nə dərəcədə kişi və qadınlara bərabər qaydada fayda verə bilmələri, DİM-lərə nail olunub yaxud olunmamasına böyük təsir göstərəcək.

Gender bərabərliyini iş fəaliyyətinin təşkilində əsas tutaraq, özəl sektor hər kəsə fayda gətirəcək inkişafa səbəb ola bilər. Qadınların iqtisadi cəhətdən gücləndirilməsi bunu dərk edən və icra edən şirkətlərə böyük fayda təmin edir. Bu baxımdan, özəl sektor qadınların iqtisadi gücləndirilməsi hərakatında mühüm tərəfdaş ola bilər.

Birləşmiş Millətlər Təşkilatı olaraq, qadınların iqtisadi hüquqlarını təşviq etməkdən qürur duyuruq.

Biz həmişə deyirik ki, “Qadınların iqtisadi cəhətdən gücləndirilməsi insan haqlarına dair dünya öhdəliyini yerinə yetirmək üçün icra edilən yalnız “doğru hərəkət” deyil, həmçinin, inkişaf, iqtisadi artım, rifahın tərəqqisi və biznes üçün “ağıllı bir addım”dır.

“Araşdırmalar göstərir ki, əgər qadınlar iqtisadiyyatda bərabər şəkildə iştirak edə bilsəydilər, qlobal ÜDM 2025-ci ilə qədər 26 faiz, yəni 12 trilyon dollar arta bilərdi“, lakin təəssüf ki, hazırda çalışma yaşında olan qadınların yalnız 50 faizi əmək bazarında fəaliyyət göstərir. Kişilərdə isə bu rəqəm 77 faiz təşkil edir. Bundan əlavə, qadınlar əsasən, qeyri-rəsmi və sosial təminatı olmayan işlərdə çalışır və kişilərə nisbətən orta hesabla, 23 faiz daha az əmək haqqı alır. Qadınlar eyni zamanda, ödənişsiz olaraq ən azı 2.5 dəfə çox ev və baxıcı işləri ilə məşğul olurlar.

Azərbaycanda, bu məsələləri həll etmək və qadınlara yeni imkanlar yaratmaq məqsədilə BMT-nin İnkişaf Proqramı BMT-yə daxil digər həmkar təşkilatlar, eləcə də, yerli hökumət, Avropa Birliyi, ABŞ Beynəlxalq İnkişaf Agentliyi, o cümlədən, “Coca-Cola” Fondu kimi beynəlxalq donor təşkilatlarla və İsveçrə Əməkdaşlıq Bürosu ilə sıx əməkdaşlıq edir.

Hazırda biz, bütün çətinliklərə baxmayaraq, kənd yerlərində bu zamana qədər qadınlar üçün əlçatmaz olan resurslara giriş imkanı yaradır, əvvəllər xəyalını belə etmədikləri biznes sahibi olmalarına və nəticədə, maliyyə cəhətdən müstəqil olmağa dəstək oluruq.

Çıxışımı yekunlaşdırmazdan öncə, fürsətdən istifadə edərək bu hesabatı və bugünkü tədbiri ərsəyə gətirən müxtəlif təşkilatlara və fərdlərə zəhmət və səylərinə görə təşəkkür edirəm.

İsveçrə İnkişaf və Əməkdaşlıq Agentliyi və İsveçrə Səfirliyinə bu işin maliyyələşdirilməsində böyük töhfə verdiklərinə, tədqiqat boyunca öz tövsiyə və dəstəklərini əsirgəmədiklərinə görə səmimi minnətdarlığımı bildirirəm.

Tanınmış milli QHT –  “Rasional İnkişaf Uğrunda” Qadınlar Cəmiyyətinin yerli mütəxəssislərindən ibarət komandası bu sahədə məlumatların toplanmasına kömək etdi.

Mən həmçinin, BMT-nin İnkişaf Proqramı və BMT-nin Əhali Fonduna, Gender Qiymətləndirmə missiyasına rəhbərlik etdiyinə və İsveçrənin dəstəyini əlavə maliyyə yardımı ilə tamamladığına görə təşəkkür edirəm.

Hökumət tərəfdən, Ailə, Qadın və Uşaq Problemləri üzrə Dövlət Komitəsinə öz minnətdarlığımı bildirirəm. Etibarlı tərəfdaşımız və gender məsələləri ilə bağlı bütün layihələrimizin uzunmüddətli dəstəkçisi olan Komitə, bu təşəbbüsə ümumi dəstəyin təmin edilməsində, həmçinin Bakı və regionlarda sahələrdəki işlərin rəvan şəkildə aparılmasında böyük rol oynayıb.

Özəl sektorun informasiya tərəfdaşı olaraq bugünkü açılış tədbirinə dəstək olan Azərbaycandakı Amerika Ticarət Palatasına xüsusi təşəkkür edirəm.

Son olaraq,  mütəxəssis rəyi və təhlillərini bizimlə paylaşan, hesabatın müəllifi Dr. Aysel Vəzirovanı sizə təqdim etmək istərdim. O, bu gün tədbirdə iştirak edir və çıxışımdan sonra araşdırmanın nəticələrini təqdim edəcək.

Çox sağ olun! Diqqətiniz üçün təşəkkür edirəm!