Baş Katibin 2026-cı il Beynəlxalq Minatəmizləmə Fəaliyyəti Günü münasibətilə müraciəti

Minalar, müharibənin partlayıcı qalıqları və əldəqayırma partlayıcı qurğular mülki əhali, xüsusilə də uşaqlar üçün faciəvi nəticələr doğurur. Münaqişələrin sayının çoxaldığı və hərbi xərclərin sürətlə artdığı bir şəraitdə bu təhlükələr daha da kəskinləşir.

Bu silahlar döyüşlər başa çatdıqdan sonra yoxa çıxmır. Onlar Kolumbiya, Efiopiya, Livan və Myanmadakı tarlalarda, Qəzzada dağıntılar arasında, həmçinin Suriyadakı icmalarda gizli şəkildə qalmaqda davam edir. Onlar hər il minlərlə insanın ölümünə, xeyli daha çox insanın isə yaralanmasına səbəb olur. Bunlar çox vaxt münaqişələr başa çatdıqdan uzun müddət sonra baş verir.

Minatəmizləmə fəaliyyəti sülhün kövrək olduğu, humanitar cavab tədbirlərinin təxirəsalınmaz xarakter daşıdığı və inkişafın qeyri-sabit olduğu yerlərdə mühüm rol oynayır. Bu fəaliyyət BMT-yə və onun tərəfdaşlarına daha təhlükəsiz şəraitdə işləməyə imkan verir, həmçinin dağıntıya məruz qalmış icmaların dirçəlməsinə və yenidən qurulmasına şərait yaradır.

Bu Beynəlxalq Mina Xəbərdarlığı və Minatəmizləmə Fəaliyyətinə Yardım Günü münasibətilə, bütün Üzv Dövlətləri müvafiq beynəlxalq sazişlərə, o cümlədən “Piyada əleyhinə minaların istifadəsi, yığılması, istehsalı və ötürülməsinin qadağan edilməsi və onların məhv edilməsi haqqında Konvensiya”ya qoşulmağa və onlara riayət etməyə çağırır, bu sazişlərdən çıxmış dövlətləri isə yenidən qoşulmağa səsləyirəm. Bu olduqca vacib mexanizmlər qorunub saxlanılmasa, mülki əhalinin müdafiəsi zəifləyəcək və artıq təhlükə altında olan 100 milyon günahsız insanın sıralarına yeniləri əlavə ediləcək.

Bu ilin “Sülhə investisiya edin. Minatəmizləmə fəaliyyətinə investisiya edin” şüarı minaların təmizlənməsi prosesinin sürətləndirilməsinin, risklərlə bağlı maarifləndirmənin gücləndirilməsinin, zərərçəkmişlərə göstərilən yardımın genişləndirilməsinin, silah ehtiyatlarının azaldılmasının və minaların olmadığı bir dünyanın təşviq edilməsinin zəruriliyini vurğulayır.

Bu silahların yaratdığı təhlükəni aradan qaldırmalıyıq ki, dünyanın hər yerində bütün insanlar təhlükəsiz şəraitdə və ümidlə yaşaya bilsinlər.