BMT-nin yaranmasının 80 illiyi günündə Azərbaycan və Birləşmiş Millətlər Təşkilatı 2026–2030-cu illər üçün yeni Əməkdaşlığa dair Çərçivə Sənədini imzalayıb

Bakı, [24 oktyabr 2025-ci il] - Birləşmiş Millətlər Təşkilatının (BMT) yaranmasının 80 illiyi günündə Azərbaycan Respublikası Hökuməti və BMT-nin Azərbaycandakı Komanda Qrupu 2026-2030-cu illəri əhatə edən yeni BMT və Azərbaycan arasında Dayanıqlı İnkişaf üzrə Əməkdaşlığa dair Çərçivə Sənədini (UNSDCF) imzalayıb.

Yeni Çərçivə Sənədinin Azərbaycan Respublikasının iqtisadiyyat naziri Mikayıl Cabbarov və BMT-nin Azərbaycandakı rezident əlaqələndiricisi Vladanka Andreyeva imzalayıblar. Sənəd qarşıdakı beş il üçün Azərbaycan Hökuməti və BMT arasında tərəfdaşlığın strateji istiqamətlərini müəyyən edir, dayanıqlı inkişafın təşviqi və Azərbaycanda bütün insanların rifahının artırılması istiqamətində birgə öhdəlikləri əks etdirir.

BMT-nin Azərbaycandakı rezident əlaqələndiricisi Vladanka Andreyeva Dayanıqlı İnkişaf Məqsədlərinə nail olunmasında Azərbaycan Hökuməti ilə BMT arasındakı möhkəm tərəfdaşlığı vurğulayıb. Xanım Andreyeva qeyd edib ki, BMT-nin 80 illiyi ilə eyni vaxta təsadüf edən yeni Dayanıqlı İnkişaf üzrə Əməkdaşlığa dair Çərçivə Sənədini imzalanması insanların və planetin dayanıqlı inkişafına dair ortaq öhdəlik üzərində qurulmuş yeni və gələcəyə istiqamətlənmiş əməkdaşlıq mərhələsinin başlanğıcını təmsil edir.

Xarici İşlər nazir Ceyhun Bayramov çıxışında BMT-nin çoxtərəfli diplomatiyanın əsas dayaqlarından biri kimi mühüm rolunu vurğulayaraq, təşkilatın 80 illiyi münasibətilə təbriklərini çatdırıb. Cənab Bayramov Azərbaycanın BMT-nin Qlobal Gündəliyi ilə tam uzlaşaraq Dayanıqlı İnkişaf Məqsədlərinin irəlilədilməsi, rəqəmsal innovasiyaların tətbiqi, qadınların və gənclərin hüquq və imkanlarının artırılması, humanitar təşəbbüslər və mədəniyyətlərarası dialoqun təşviqinə xüsusi önəm verdiyini qeyd edib.

İqtisadiyyat naziri Mikayıl Cabbarov çıxışında Azərbaycan ilə Birləşmiş Millətlər Təşkilatı arasında uzunmüddətli və səmərəli əməkdaşlığı vurğulayıb. Tərəfdaşlığın davamlı inkişaf üçün yeni imkanlar və ölkəmizin iqtisadi inkişaf modelini təkmilləşdirmək üçün effektiv dəstək mexanizmləri yaratdığını bildirib. Nazir bildirib ki, birgə fəaliyyətin yeni mərhələsi olan Çərçivə Sənədi əvvəlki əməkdaşlıq dövrlərində əldə edilmiş nailiyyətlərə əsaslanır və Azərbaycanın uzunmüddətli sosial-iqtisadi prioritetləri, o cümlədən insan kapitalının inkişafı, innovasiyaların, ekosistemlərin, iqlimə davamlılığın, səmərəli yaşıl keçidin təşviqi, inklüziv artımın təmin edilməsi istiqamətində səyləri ilə uzlaşır.

Tədbirdə dövlət qurumlarının rəhbərləri, diplomatik korpus və beynəlxalq təşkilatların nümayəndələri iştirak ediblər. İştirakçılar BMT-nin səkkiz onillik ərzində həyata keçirdiyi qlobal fəaliyyətləri və Azərbaycanın Təşkilatla əməkdaşlığı çərçivəsində 2030 Gündəliyinə doğru irəliləyişi müzakirə ediblər.

Mərasimdə həmçinin BMT-nin sülhün, ləyaqətin və hamı üçün firavanlığın təşviqinə həsr olunmuş 80 illik tarixini əks etdirən “Yaşayan miras” (“A Living Legacy”) adlı qısa film nümayiş etdirilib.

2026–2030-cu illər üçün BMT Dayanıqlı İnkişaf üzrə Əməkdaşlığa dair Çərçivə Sənədi BMT-nin Azərbaycandakı inkişaf fəaliyyəti üçün əsas planlaşdırma sənədi kimi çıxış edir və Dayanıqlı İnkişaf Məqsədlərinə doğru irəliləyişi sürətləndirmək məqsədilə koordinasiyalı, şəffaf və hesabatlı birgə fəaliyyəti istiqamətləndirir.