Press reliz

Aİ və ÜST Azərbaycanda psixi sağlamlıq xidmətlərinə dəstək məqsədilə təlimçilər üçün təlim təşkil edib

04 avqust 2022

  • Avropa İttifaqının (Aİ) maliyyə dəstəyi ilə həyata keçirilən Psixi Sağlamlıq Xidmətlərinin Münaqişədən Sonrakı Dövrdə Koordinasiyası və Transformasiyası layihəsi çərçivəsində Ümumdünya Səhiyyə Təşkilatının (ÜST) Ölkə Ofisi tərəfindən Psixi Sağlamlıq Çətinlikləri üzrə Fəaliyyət Proqramı (mhGAP) əsasında təlimçilər üçün təlim təşkil edilib. 

Açılış mərasimində Azərbaycan Respublikası Səhiyyə Nazirliyinin Psixi Sağlamlıq Mərkəzinin direktoru professor Fuad İsmayılov, TƏBİB-in İlkin səhiyyə xidmətinin təşkili şöbəsinin müdiri Dr. Nəhmət Rəhmanov və İxtisaslı tibbi yardım xidməti şöbəsinin mütəxəssisi Dr. Aygün Quluzadə iştirak edib. Açılış zamanı professor Fuad İsmayılov Azərbaycanda psixi sağlamlıq xidmətinin təşkili haqqında təqdimatla çıxış edib, Dr. Nəhmət Rəhmanov isə öz növbəsində, ilkin səhiyyə xidmətinin təşkili barədə məruzə edib.

“mhGAP” üzrə beynəlxalq sertifikatlı təlimçi Dr. Nino Maxaşvili tərəfindən keçirilmiş 5 günlük təlimin əsas məqsədi psixiatr və ilkin səhiyyə xidməti müəssisələrində çalışan tibb işçilərindən ibarət yerli təlim komandasının yaradılması olub. Bu 20 təlimçi layihənin həyata keçirildiyi bölgələrdə ilkin səhiyyə xidməti göstərən həkimlərə ən çox rast gəlinən psixi sağlamlıq pozuntularını müəyyən etmək, idarə etmək və yönləndirmək üzrə təlimlər keçəcək.

Təlimdə klinik depressiya, post-travmatik stress pozuntusu və stress kimi psixi sağlamlıq pozuntuları haqqında, eləcə də yardım üçün müraciət edən şəxslərə düzgün yanaşmanın təməl prinsipləri barəsində sessiyalar yer alıb. Bununla yanaşı, gələcək təlimçilərin təqdimat və idarəçilik bacarıqlarının təkmilləşdirilməsi məqsədilə qrup işləri təşkil olunub. Təlimin son günündə isə iştirakçılar komandalar şəklində seçdikləri mövzuda hazırladıqları təlim sessiyasını təqdim edib və daha sonra sertifikatla təltif olunub.

Psixi Sağlamlıq Xidmətlərinin Münaqişədən Sonrakı Dövrdə Koordinasiyası və Transformasiyası layihəsi psixi sağlamlıq xidmətlərinin ilkin səhiyyə səviyyəsində təkmilləşdirilməsi məqsədilə ÜST-nin Azərbaycan Ölkə Ofisi tərəfindən Avropa İttifaqının maliyyə dəstəyi ilə həyata keçirilir.  Layihənin məqsədi psixi sağlamlıq və psixo-sosial dəstək üçün multidisiplinar koordinasiya mexanizminin yaradılmasına yardım etmək və ilkin səhiyyə xidməti müəssisələrində psixi sağlamlıq xidmətləri potensialını artırmaqdır. Sözügedən layihə Aİ və ÜST-nin Azərbaycana davamlı dəstəyinin tərkib hissəsidir.

Aİ və ÜST Azərbaycanda psixi sağlamlıq xidmətlərinə dəstək məqsədilə təlimçilər üçün təlim təşkil edib

Fanara Bunyadzada

Fənarə Bünyadzadə

ÜST
İctimaiyyətlə əlaqələr üzrə mütəxəssis

Bu təşəbbüsdə iştirak edən BMT qurumları

ÜST
Ümumdünya Səhiyyə Təşkilatı

Bu təşəbbüs vasitəsilə dəstəklədiyimiz məqsədlər