Avropa İttifaqı və BMTİP peşə təhsilində rəqəmsal resursların yaradılmasını dəstəkləyir

Aİ-nin maliyyələşdirdiyi "Gələcək üçün Peşə Təhsili" layihəsi çərçivəsində ölkədə ilk dəfə olaraq “MOODLE” təhsil platformasından istifadə edərək rəqəmsal öyrənmə və qiymətləndirmə resurslarının hazırlanması istiqamətində 4 həftəlik təlim kursu həyata keçirilir.

Təlim kursu sahə üzrə mütəxəssis Dr. Maria Toro-Troconis tərəfindən tədris edilir. Kurs izahedici vebinarlar və sərbəst öyrənmə imkanları təmin edilərək aparılır. Proqramda Bakı, Gəncə, Şəki, Cəlilabad, Lənkəran, İsmayıllı, Mingəçevir və Qəbələdə yerləşən 12 peşə təhsil müəssisəsindən seçilmiş aparıcı mütəxəssislər  iştirak edir.

Kurs müddətində iştirakçılar innovativ tədris strategiyaları, metodları və təlim bacarıqlarının təşkili, eləcə də seçilmiş peşə və mövzuya uyğun rəqəmsal dərs planı və qiymətləndirmə planının qurulması mövzuları üzrə bilik və bacarıqlarını artırırlar. Proqramın sonunda kursu müvəffəqiyyətlə başa vuran iştirakçılar sertifikatla təltif ediləcək.

Kursun məqsədi peşə təhsilində rəqəmsallaşmanın tətbiqinə dəstək olmaq və bu sahədə yeni resursların yaradılmasına birbaşa töhfə verməkdir.

Sözügedən təlim kursu, Aİ tərəfindən maliyyələşdirilən və BMTİP tərəfindən Peşə Təhsili üzrə Dövlət Agentliyi ilə birgə həyata keçirilən “Gələcək üçün Peşə Təhsili və Təlimi: Azərbaycanda Qabaqcıl Peşə Təhsili Mərkəzlərinin yaradılmasına dəstək” layihəsi çərçivəsində təşkil olunur. Layihənin əsas məqsədi əmək bazarının tələblərinə uyğun tədrisin təşkilinə dəstək olmaq və bu istiqamətdə Azərbaycandakı peşə təhsil müəssisələrinin müasirləşdirilməsinə yardım etməkdir.

Əlaqə üçün məlumat:

Leyla Qurbanova, BMTİP-nin Azərbaycan ofisinin Kommunikasiyalar üzrə mütəxəssisi – leyla.gurbanova@undp.org

Gülnarə Bayramova, Avropa İttifaqının Azərbaycan Nümayəndəliyinin Mətbuat və İnformasiya Rəhbəri –gulnara.bayramova@eeas.europa.eu