Press reliz

Avropa İttifaqı və Ümumdünya Səhiyyə Təşkilatı Azərbaycana COVID-19-la mübarizəyə dəstək üçün tibbi ləvazimat və avadanlıqlar təhvil verib

13 октјабр 2021

  • Avropa İttifaqı (Aİ) və Ümumdünya Səhiyyə Təşkilatı (ÜST) COVID-19-a yoluxmuş ağır xəstələrin müalicəsində istifadə olunması üçün 2 ədəd invaziv və 1 ədəd qeyri-invaziv süni tənəffüs aparatı, 4 xəstə monitoru, yüksək axınlı oksigen verilməsi üçün 12 nazal kanyula və COVID-19-un aşkarlanması üçün 4000 PZR testi üçün reagent Azərbaycan Respublikası Səhiyyə Nazirliyinə təhvil verib.

Bundan əlavə COVID-19 hallarının müşahidəsində istifədə üçün 100 ədəd tablet, 5 ədəd noutbuk, 5 ədəd modem və onlar üçün gərəkli proqram təminatı Səhiyyə Nazirliyinə təqdim edilib.  

Bu ləvazimat və avadanlıqlar Avropa İttifaqının maliyyə dəstəyi ilə Ümumdünya Səhiyyə Təşkilatının Azərbaycandakı Nümayəndəliyi tərəfindən “Sağlamlıq üçün Həmrəylik Təşəbbüsü” layihəsi çərçivəsində ölkəyə gətirilib. Qeyd edək ki, 27 mart 2020-ci ildə Avropa İttifaqı Azərbaycan daxil olmaqla Şərqi Avropa və Qafqazda altı ölkədə COVID-19 pandemiyasının qarşısını almaq, virusu aşkar etmək və mübarizə aparmaq məqsədilə böyük həcmli  yardım paketi ayırdığını elan edib. Daha əvvəl təşəbbüs çərçivəsində 2020-ci ilin iyul, sentyabr və dekabr aylarında tibb işçiləri üçün fərdi qoyucu vasitələr və pasiyentlərin müalicəsində istifadə edilən tibbi ləvazimatlardan ibarət 4 yük Azərbaycana təhvil verilib. Bundan əlavə, Aİ və ÜST Azərbaycanda COVID-19-a qarşı peyvəndləməyə yardım göstərmək və ölkənin rutin immunizasiya sistemini gücləndirmək məqsədi daşıyan 3 illik “COVID-19-a qarşı vaksinasiyaya dəstək” layihəsi başlatmışdır.

"Şərq Tərəfdaşlığı ölkələrində Avropa Ittifaqının Sağlamlıq üçün Həmrəylik Təşəbbüsü, COVID-19 pandemiyasına qarşı Avropanın ortaq cavabının tərkib hissəsidir. Həmrəylik prinsipinə əsaslanan təşəbbüs virusa qarşı mübarizədə tərəfdaş ölkələrin səhiyyə sistemlərini dəstəkləyir və ən həssas insanların ehtiyaclarını daha yaxşı həll etməyə kömək edir. Pandemiya başlayandan bəri Aİ və ittifaqın, üzv ölkələrin və beynəlxalq maliyyə qurumlarının qaynaqlarını özündə birləşdirən “Team Europe” paketi Azərbaycan da daxil olmaqla, Şərq Tərəfdaşlığının altı ölkəsinə geniş yardım göstərir. Bu yardımın məqsədi COVID-19-un təsirini azaltmaqla ölkənin uzunmüddətli sosial və iqtisadi dayanıqlılığına töhvə verməkdir” deyə  Avropa İttifaqının Azərbaycandakı Nümayəndəliyinin rəhbəri, səfir Peter Mixalko qeyd edib. 

 “COVID-19 pandemiyası bütün dünya üçün bəlaya çevrilib. Artıq iki ilə yaxındır bu şəraitdə yaşayırıq. Heç bir ölkənin səhiyyə sistemi buna tab gətirə bilməzdi. Buna görə pandemiyaya qarşı mübarizədə beynəlxalq əməkdaşlıq böyük önəm daşıyır” deyə bildirən səhiyyə nazirinin müavini Dr Viktor Qasımov göstərilən dəstəyə görə Avropa İttifaqı və Ümumdünya Səhiyyə Təşkilatına təşəkkür edib. 

“Artıq il yarımdan çoxdur ki davam edən layihə çərçivəsində Avropa İttifaqının davamlı dəstəyi ilə və ölkənin səhiyyə qurumları ilə əməkdaşlıqla Azərbaycanın pandemiyaya qarşı mübarizəsində dəstəkləməkdəyik. Bu müddət ərzində həm tibbi ləvazimatların gətirilməsi, həm də tibb işçilərinin təlimləri, texniki biliklərin paylaşımı və məlumatlandırma kampaniyaları vasitəsilə istər COVID-19-a qarşı mübarizə, istərsə də, ölkənin daha uzunmüddətli səhiyyə ehtiyaclarının dəstəklənməsinə çalışırıq” deyə ÜST-nin Azərbaycandakı nümayəndəsi və Ölkə Ofisinin rəhbəri Dr Hande Harmancı bildirib. Həmçinin, o, fürsətdən istifadə edərək Avropa İttifaqının ölkəmizdəki yeni səfiri Peter Mixalkonu təyinatı münasibəti ilə təbrik edib və fəaliyyətində uğurlar arzulayıb.

Avropa İttifaqı və Ümumdünya Səhiyyə Təşkilatı Azərbaycana COVID-19-la mübarizəyə dəstək üçün tibbi ləvazimat və avadanlıqlar təhvil verib

Fanara Bunyadzada

Fənarə Bünyadzadə

ÜST
İctimaiyyətlə əlaqələr üzrə mütəxəssis

Bu təşəbbüsdə iştirak edən BMT qurumları

ÜST
Ümumdünya Səhiyyə Təşkilatı

Bu təşəbbüs vasitəsilə dəstəklədiyimiz məqsədlər