Press reliz

FAO-Azərbaycan tərəfdaşlıq Proqramı çərçivəsində Türkiyə Respublikasına səfər baş tutub

25 август 2021

  • "Sağlam toxumluq kartof istehsalı üzrə milli sistemin yaradılması layihəsi" çərçivəsində Azərbaycan nümayəndə heyətinin Türkiyəyə səfəri baş tutub.

16-21 avqust tarixlərində baş tutan səfər çərçivəsində iştirakçılar kartof istehsalı üzrə ixtisaslaşmış qurumlarda təşkil olunan görüşlərdə iştirak edərək bir çox biliklər əldə ediblər. Səfər çərçivəsində əsas məqsəd Türkiyənin bu sektorda müxtəlif texnologiyalarının və yeniliklərinin öyrənilməsi və layihə çərçivəsində onların Azərbaycanda tətbiqi idi.

Nümayəndə heyəti Niğdə şəhərində yerləşən Kartofçuluq üzrə Tədqiqat İnstitutuna ziyarət edərək İnstitutun infrasturukturu, yeni istifadəyə verilmiş inzibati binası, laboratoriyaları, istixanaları və əkin sahələri ilə yaxından tanış olublar. Daha sonra İnstitutun rəhbəri cənab Uğur Pırlakın və İnstitutun idarə heyətinin müdirlərinin iştirakı ilə görüş keçirilib və iştirakçılara İnstitutun ümumi fəaliyyəti, strukturu, aparılan tədqiqatlar və bölgədə görülən işlərə dair təqdimat nümayiş etdirilib. Nümayəndə heyəti İnstitutun tərkibində fəaliyyət göstərən Toxuma mədəniyyəti, Yetişdirmə və Genetika, Kartof xəstəlikləri və Texnoloji test laboratoriyaları ilə tanış olublar. Burada müxtəlif torpaq-iqlim şəraitinə, xəstəlik və zərərvercilərə dayanıqlı sortların yaradılması üzrə geniş işlər həyata keçirilməkdədir. Gələcəkdə qarşılıqlı olaraq Azərbaycan Respublikasının KTN-nin Tərəvəzçilik Elmi Tədqiqat İnstitutunun və Türkiyə Respublikasının Kartofçuluq Tədqiqat İnstitutunun kartof sortlarının seleksiya işlərinə cəlb olunmasının perspektivləri müzakirə edilib. Həmçinin burada yeni texnologiya ilə aerofonikada virussuz kartof miniyumrularının yetişdirilməsi prosesi xüsusi maraqla qarşılanıb. Bu texnologiyanın Tərəvəzçilik ETİ-da tətbiq edilməsi ilə bağlı müzakirələr aparılaraq, xüsusilə emal yönümlü sortların da ölkəmizdə seleksiya yolu ilə alınması və onların gələcəkdə geniş sahələrdə əkilərək istehsal edilməsi vurğulanıb.

Səfər çərçivəsində iştirakçıların nəhəng yeraltı soyuq anbarlara ziyarəti baş tutub. Onlar ilk olaraq Niğdə və Nevşehir şəhərinin yaxınlığında yerləşən kartof saxlanması üçün istifadə olunan yeraltı soyuq anbarları ilə tanış olublar. Bu yeraltı soyuq anbarların ən önəmli özəlliyi onların heç bir soyuducu avadanlığın istifadəsi olmadan təbii olaraq soyuq temperatura malik olmalarıdır.

Daha sonra iştirakçılar Konya şəhərində təşkil olunan Türkiyənin ən böyük kartofçuluq nümayiş-sərgisi hesab olunan "Kartof Günləri" adlı festivalda iştirak edib. Türkiyənin kartof istehsalı ilə məşğul olan iri şirkətlərin iştirakı ilə keçirilən sərginin başlıca özəlliyi, stendlərin öncədən əkilmiş və nümayişə hazır əkin sahələrinin yanında quraşdırılaraq məhsulların təqdim olunmasındadır. Sərgidə Türkiyənin Kartofçuluq Tədqiqat İnstitutu da iştirak edərək milli sortlarını təqdim edib.

Sərgidə bir sıra kartof istehsalçısı olan və kartofçuluqla bağlı kənd təsərrüfatı texnikaları və texnoloji avadanlıqlar istehsal edən şirkətlərlə fikir mübadiləsi aparılmış və bir sıra əməkdaşlıq əlaqələri qurulub. Səfər çərçivəsində həmçinin Türkiyənin Kartofçuluq üzrə Tədqiqat İnstitutun əkin sahələrinə səfərlər baş tutub və tarla əkinlərinə dair müşahidələr aparılıb.

FAO-Azərbaycan tərəfdaşlıq Proqramı çərçivəsində Türkiyə Respublikasına səfər baş tutub

Abdul Mustafazade

Əbdül Mustafazadə

FAO
Sosial media, əlaqələndirmə və media ilə münasibətlər üzrə mütəxəssis

Bu təşəbbüsdə iştirak edən BMT qurumları

FAO
BMT-nin Ərzaq və Kənd Təsərrüfatı Təşkilatı

Bu təşəbbüs vasitəsilə dəstəklədiyimiz məqsədlər